Acts 3
Pita Mupamaulinu Itema Vile Tavatava'u Musoisoli
1Ioxe, no voxo vile no aso iou tatalu no 'olo'olovoxo, la Pita ilou Ioanesi mimuamua'i milai sou lexe ikilaka ulai noxou Lataua no nano no taasou lalotu tatila noxou Lataua loxo ane'i ilavusou i'oxo'oxonu. 2La ta mitema mitavulenu itema vile ne tava'u musoisoli lumamo no mine nenu mivo'onu mo. No voxo utotomu ne, ane'i ilavusou itavulenu itema ane ne sou ine'enu i'italonu no anu aitengaxu taasou lalotu tatila noxou Lataua vile ilemo lexe, “Aitenga Lailaixe” sou ulingalingau mimii noxi'a ta mitema ane i'una no nano no taasou lalotu tatila ane ne. 3Anu muxolu xe mumaisi'a Pita ilou Ioanesi no mine sou lexe ilou i'una, la mulinga lamoli noxi'a ilou. 4 aIa ane'i ilou mimatakisou itema ne. Xe Pita muavuti la muvikalanu aloxo 'o, “Nini ieni une'e mo namaisixe.” 5Xe itema ne muavuti la mumatakisi'a ilou, xo muloopala lexe ane'i ilou ilosou mii vile loxo lamoli.6 bIa Pita muavuti la muvikalanu aloxo 'o, “Eni xeni lamoli uasi. Ia mii ma'ia ane eni atetelisou 'o nesi a, eni emasaxa sou alosine. No anu xavi no ualasou Iesu Kalisito sie Nasaleti, la eni avikalaneni lexe natulu mo namuamua'i.” 7Muvikalanu aloxo ne mukalu, la sou anu mutetelisou avolu tema, io musu'ulinu sou mutulusou. Xe alaxu vilesisi 'o, la tavatava'u ilou tava'u vo'uvo'uxu e musoisoli ne, muxali pekia'u. 8La sou anu mupisikei sou mutulu xe mumuamua'i sou mumuline'i ilou mi'unalai no nano no taasou lalotu tatila noxou Lataua. Anu mumuamua'i, la muili'eli'e xe mu'iti'itinu Lataua ualasou. 9Xe ta mitema latala ne, mimaisou no mine mumuamua'i xe u'iti'itinu Lataua ualasou ne, 10la ane'i mitongonusi lexe anu itema e muxoxolu sou mulingalinga no aitengaxu taasou lalotu tatila noxou Lataua vile e ilemo lexe, “Aitenga Lailaixe” ne, anu ane. Ane'i mimaisou mii ane ne muxali noxou ne, la ane'i mixavutala piena xe mikuluke manina no anu.
Pita Mua'alo Noxi'a ta Mitema La
11No mine itema sou lingalinga ne uvaitaone'i Pita ilou Ioanesi, la ta mitema latala ane mimaisou la mikuluke ne, miiaveiave mine'e noxi'a no tani tila noxou Lataua pa'umolu ilemo lexe, “Matavala noxou Solomoni.” 12Xe Pita mumaisi'a aloxo ne, la anu muvikalane'i aloxo 'o, “Ngingi ta mitema sie Isilaeli, loxovaa ane ngingi ngekuluke no anu mii ane muxali 'o? Mo loxovaa ane ngingi ngamatakisixe noxou 'o? Male, ngingi ngexavutala lexe nexi noxou mexi xavi tatila mo temulimulinu 'ili'ilixo ane Lataua mumasaxau, la sou nexi tepamaulinu itema 'o la anu a umuamua'i 'o? Uasi. 13 cIa avikalangengi aloxo 'o. Lataua noxi'a Avalaamu ilou Aisaki mo Iakovo mo noxi'a ta 'ilu'ilusinenge ne, Anu mu'itinu itema sou xaixai noxou vitanisi e Iesu ne. Ngingi nge'italonu no avo'a ta mitema sou lexe ivau usoli la Pilato mumasaxa lexe ululusou, la ngingi ngexiu tumalingeu no iou. 14Ngingi ngexiu tumalingeu itema ane mu'italonu maulixu noxou Lataua mo mu'oxonu 'ili'ilixo muisalili mukalusi, ia ngelinga noxou Pilato lexe anu ululusou itema ane muvau itema usoli ne une'e noxinge. 15Ngingi ngevau itema ane sou ulosinge mauli ne musoli. Ia Lataua mutulusou no anu soli xe nexi noxou temaisou mii ane ne, la nexi taa'alomengi no anu. 16Nexi noxou Ioanesi temulaxu tanexi no anu xavi no ualasou Iesu, la sou itema ane ngingi ngemaisou mo ngelavusou ne anu muxali laixe aloxo ngingi ngemaisou. Iesu molu muavutinoxu tanexi sou temuxaxu noxou, la sou itema 'o mumauli.17 dIoxe, ta vivilo. Eni elavu lexe ngingi ngongi'a ta tatilasinge ngalavusou Iesu laixe uasi, la sou ngingi nge'oxonu 'ilixo ane ne noxou. 18Ia Lataua mutotokalasou noxi'a ta mitema sou palomatana tatei mo lexe Kalisito ne uno'u navunavu. La sou mii ma'ia ane Anu mutotokalasou ne muxali manina loxo ngingi nge'oxonu 'ilixo masua noxou. 19 eLa sou ngingi ngaxiu opongengi mo ngalivu ngalai noxou Lataua, mo sou Anu ululusou susu noxinge. 20Lexe ngingi nga'oxo aloxo ne, la Tila ulosinge voxo sou ma'ila mo ngano'u xavi la upalusou Kalisito ane Anu musosovosou singe une'e. Itema ane ne, Anu Iesu. 21Anu uxolu teitexi no opo loxotolo ne ulai utalo no voxo ane Lataua u'oxonu mimii ukalusi uxali alavua loxo Anu musakii vaikalasou tatei noxi'a ta mitema sou palomatana noxou. 22 fXo tatei, la Mosesi muvikala aloxo 'o, ‘Tila anu Lataua noxinge usosovosou itema sou palomatana vile taingengi ne la aloxo Anu musosovosilo. Ngingi ngalomuxu vaivaikalau ukalusi. 23Ia 'ena'ei ane umasaxa sou ulomuxu vaikalau uasi, la Lataua uxexeenu noxi'a ta mitema noxou mo ukalusou maulixu.’
24Manina musuku lexe ta mitema sou palomatana ukalusi musoko noxou Samueli mune'e ne mitotokalasou voxovoxo 'o ne alaxu tavu'alo mukalu. 25 gNgingi ne, ta 'ilu'ilusune'i ta mitema sou palomatana ilo'a ta mitema ane Lataua musakii vaikala tei noxi'a. La Lataua muvikalanu Avalaamu aloxo 'o, ‘Noxou 'ilusuneni vile, la eni aalusi'a ta mitema ukalusi no lialia 'o.’ 26 hIoxe, la sou Lataua musosovosou itema sou xaixai noxou vitanisi sou mupalusou mune'e noxinge tei sou lexe ualusinge mo usu'ulingengi vilevilesi sou ngaxiu tumalingeu 'ili'ilixo masumasua noxinge.”
Copyright information for
ATA